Conferéncia « Quand Pikachu parla occitan, culturas japonesas e lengas d’aicí »
De qué quò sembla quand tradusem los noms de las famosas bestionas de pòcha en occitan ? E puei mas qué quò es l’occitan, quela lenga que daus uns ‘pelan enquera « patois », e a la quala quò es ben malaisat de prestar un tant siá pauc de modernitat ? Es que se pòt vertadierament articular una cultura populara e una lenga minoritària ? Aventurem-nos ensemble dins las nautas erbas de la coneissença, luenh de las ideas recebudas, per una conferéncia inedita a la caforcha de las disciplinas, daus noveus folclòres e de las ancianas mitologias, de ls lengas intemporalas d’aquí e d’alai… Partem rencontrar una lenga pròcha mas totparier desconeguda que pòt tanben parlar de tot, e subretot de çò que nos divertís e nos amusa, los Pokémon maitot ! Prestes a far los geeks en òc ? Aquí se passa !
Una conferéncia que boira juecs video, lingüistica, bestionas de pòcha, cultura(s), folclòre e mitologias de çai e de lai.
Veiquí per la presentacion de quela conferéncia que fau sus demanda. Per lo contexte : a la surtida de Pokémon GO en 2016 m’era amusat a traduire en occitan la prumiera puei la segonda generacion de quela bestionas virtualas. En quò fasent, me rendí compte de las inspiracions lingüisticas e culturalas qu’aviá butit a lur batejada, dins la lenga d’origina obentot en francés.
Entau, quand un daus organizaires dau Toulouse Game Show nos venguet trobar emb quauques amics per veire se li podiam perpausar una conferéncia en liam emb l’occitan mas per lur public especific, perpausí naturalament de me servir daus Pokémons per transmetre daus elements lingüistics comparats entre França e Japon, seguits de quauques banturladís sus nòstras mitologias e folclòres respectius.
Quela conferéncia fuguet donc presentada un prumier còp en 2018 dau temps dau Toulouse Game Show. En 2022, decidí de la tornar préner e de la tornar estructurar, per èsser en capacitat de la perpausar mai larjament.
Demòra volontàriament grand public, mas permet de far passar de las coneissenças variadas emb leugieretat e un pauc d’umor.
