Coleras e Retrachs

Coleras e Retrachs es una sega directa dau prumier Coleras, qu’era, coma queu-quí, un recuelh de cronicas paregudas dins mai d’una revuda occitana e escrichas en totalitat per lo pair. Pense poder dire que la coleraes venguda dempuei quò un genre literari en se, un biais d’eissai anticipatiu de sornas realitats a venir, jos cobert d’umor. D’aquí lo concepte de “paranò-derisionisme” qu’emplejam a prepaus de las coleras. Per escriure una colera, fau una fotuda dòsa de meschanta fe, d’autò-derision, un brijon de misantropia, un pauc d’eimaginacion deliranta…e ‘lumar la tele. Ai talament vist mon pair escriure e publicar quelas cronicas, emb tot lo costat catartic que quò podiá aver que me sei botat a n’escriure quauquas unas io tanben, dins la seguela, “au biais de” . Fau creire qu’era mai dins la filiacion que dins lo pastiche puei que se disset que quauques uns enquera n’aurián pas vist lo chamnhament de pitit nom d’autor d’una cronica l’autra ! Tot naturalament au moment de publiar queu recuelh que cuebra 1996 a 2013 avem tot boirat, e presentat cronologicament. E se mon nom apareis mas en pitit sus la cuberta, quo es que n’ai tot parier escrich mens que se !

Editor : IEO Edicions
Colleccion : Ensages
Parucion : 10/12/2014
ISBN : 9782859105372
188 paginas
14 x 20 cm
16.00 €