Conferéncia « Las lengas minoritàrias dins lo juec vidèo »

En genier de 2025, a l’invitacion dau Toulouse Game Dev que mercege, aguí l’enchaison de presentar una novela conferéncia a l’entorn de l’utilizacion de las lengas e culturas minoritàrias dins lo juec vidèo. S’agissiá de liurar quauques retorns d’experiéncia, après mon trabalh (pas oficiau) sus los Pokémon e Stardew Valley e queu mai oficiau sus Dordonha, mas tanben de balhar a un public de professionaus dau juec vidèo de pas pistas que se pòden utilizar concretament per se servir de quela matèria dins lurs creacions.

Quò era lo prumier còp que presentava un estat d’una recercha que m’anima dempuei longtemps desjà e d’un interès prund que pòde aver per los liams que podem establir entre lo juec vidèo e las lengas e culturas minoritàrias/minorizadas. Ai totjorn dins la testa l’idèa de chavar enquera mai queu subject, o perqué pas de ne’n far una tèsi se lo temps me’n es balhat.

En esperar, i a quela conferéncia lai, qu’es una debuta de quauquaren. Fuguet difusada en directe e en repaly sus YouTube, onte se pòt totjorn veire (l’avetz quí dejós). Lo public dau TGD era plan aculhent sus un subject qu’auriá pogut lur paréisser un pauc « nicha » e las questions a la fin era tanben pertinentas. Quò era una bona experiéncia d’anar parlar de juec vidèo, qu’es per ieu pusleu ‘na passion, a daus professionaus !