Tòca-Maneta e lo juec vidèo

04/09/2012

“Chaspaires de maneta, picanhaires de botons, balhaires de jòia a stick e esportius de canapè, adiussiatz !”

Quo es per quilhs mots que comence la cronica Tòca-Maneta dempuei 2012. Lançada a la sollicitacion de Guilhem Gratiolet, per l’emission Good Morning Occitània (Ràdio Occitània/Ràdio País), quela cronica, que n’aviá l’eideia sens la concretizar dempuei quauques temps desjà, es donc estada radiofonica e pensada per la ràdio, mas pro leu ne’n botí lo texte en linha sus mon blog, çò que me permetet d’apondre daus imatges e de las illustracions, lo discors sole podiá pas tot mostrar !

Mai de seissanta numeròs desjà, siá 120 paginas de cronica sus lo juec vidèo en occitan, publicadas sus la rantela a un ritme constant s’es pas regulier. E sei enquera surpres de veire que si-ben quò interessa dau monde !

Luenh dau ton volontiers umoristic emplejat dins Tòca-Maneta, ai tanben realizat de las òbras e de las recherchas sus lo juec vidèo, l’industria vidèoludica o quauques aspects especifics, dins un cadre universitari o pas.

Passionat per queu mèdia, lo considere coma un vertadier ben culturau, coma la pintura o lo cinèma, e m’interesse particularament a las condicions de sa creacion, a sa recepcion e percepcion, coma aus crotzaments que permet emb d’autres mèdias.