Site-Botica dau CCOR

08/08/2018

Coma sega logica au site dau Diari, ieu sei partit puei sus una refonta totala dau site dau CCOR, lo Centre Culturau Occitan dau Roergue, siá lo cercle rodanés de l’IEO, que la seccion regionala produís lo Diari… me seguetz ?

Lo CCOR aviá desjà un site, ancian (2009/2011, una eternitat en temps internetic !), e un eissai pas ‘chabat d’una refonta sus Prestashop. Prestashop ? Òc-es, per çò que una de las activitats dau CCOR quò es la gestion d’una botica de produchs culturaus occitans a l’Ostau dau Patrimòni, plaça Foch a Rodés. Lur faliá ‘na botica en linha, passar per la dematerializacion de queu servici per respondre dau mielhs que pòden a las demandas de clients e d’afeccionats de cultura occitana daus uns còps installats plan au-delai de las frontieras avaironesas !

A la via Prestashop, ieu ai preferit me bonhar un pitit pauc mai dins WooCommerce qu’aviá desjà pataunhat per Lo Diari. E se vesetz quauquas semblanças emb queu site o enquera emb queu que legissetz actualament, coma un biais de signatura chatduelhesca, quò es ma fe bien normau ! Content daus servicis renduts per WordPress e DIVI, lur sei demorat fideu, e tanben per ma prumiera vertadiera botica en linha.

E me sei fach plaser : integracion d’un sistema de filtres per navegar dau mielhs possible au demieg dau milierat de produchs disponibles, implementacion de taxonomias per far remontar los autors (nom francés E occitan), daus obratges mas tanben daus editors, mai tanben quauques autres criteris de recercha, ai vougut un sistema de botica simple en front-end mas priund dins son back-end.

Ai en mei de quò implementat un module d’agenda, d’actualitats e quauquas autras foncionalitats que m’eran demandadas, en m’adobant per que tot puescha au maximum figurar en One Page, siá una sola pagina d’acuelh, atalhonada en modules que tòrnan préner totas las informacions necessàrias au visitor. Ai subretot pogut trabalhar sus lo bilinguisme totau emb WPML, solucion completa emb la quala jugava dempuei quauques temps. De que botar concretament l’occitan au mesme niveu que lo francés !