Lo País Polit daus Potonors

29/11/2013

I a de las chausas que son pro parlantas entau visualament… Mas per tornar situar, lo País Polit daus Potonors quo es un blog persò, queu de mon colocatari…de cerveu. Lo meu, qué. Com quò se pòt sentir d’en prumier, l’umor subrenada, dau mens quante tomba pas tot au fons coma un plomb lestat.

Tecnicament, queu site/blog es tanben la resulta d’un pari a pus près tant fadat que l’estetica kawaï/neciauda/geek/mausana que l’i desvelope : crear de la personalitat alòrs que podem ren tocar. De fach, sus un blog auberjat directament per WordPress, podetz chamnhar de tema, mas pas vertadierament tocar los modeles de paginas (templates), autrament dich per los non-iniciats la construccion generala. E ben ma fe quo es armat de paciéncia e d’eideias surtidas de las dead-zones de mon cerveu que concebí un sol e unic fichier CSS per desvirar lo problema e donar a queu blog la personalitat que io li desirava. Autrament dich : totas las modificacions son mas estilisticas. Autrament dich enquera per los que son pas iniciats : quo es coma se vos donavan una maison, desjà bastida e ondrada, mas que decidessetz de tot tornar veire dempuei la debuta, nonmàs armat d’un pinceu e d’una selha de pintura.

Retrospectivament, vese que m’amusar coma un fadurle sus queu blog (que tòrne tocar enquera regularament) me butet a crear un nombre consequent de pitits imatges, infografias, dessenhs, lògos, e de me perfeccionar dins de las tecnicas de dessens per ordinator que io utilize enquera uei. Es en mai de quò pro alimentat en produccions e creacions diversas.