Lo Diari

01/03/2018

Lo Diari quò es una demanda de Sebastian Pugin e l’IEO Miegjorn Pireneus (o Region Occitània Pireneus Mediterranea aura). Quò era una revisda qu’existava dempuei bien dau temps desjà, mas qu’a pres recentament un brave còp de novelum, notadament estetic, emb una vertadiera grafista que comencet de trabalhar dessús. Magazina culturau en occitan de crana qualitat visuala, onte ai pogut, un pauc avant de començar a trabalhar sus lo site, prepausar de las cronicas tematicas a l’entorn dau juec video.

Quò es pro naturalament que l’énvia de modernizacion se portet sus internet. Un site existava desjà, jos Jimdo, emb de las foncionalitats e una frequentacion redusida. Aquí, la demanda quò era un vertadier magazina culturau en linha, coma Transfuge, Telerama… quò n’es d’ambicion !

Espere que i ai respondut, emb un site fortaud, visuau, adaptatiu, onte tot se bòta en plaça dejós los uelhs dau legidor per li assegurar un confòrt maximau. Pensatz vautres : chasca rubrica de chasque autor a sa pròpia mesa en pagina, sa “pauta” grafica, dau mesme biais que sus un magazina papier, lo dinamisme en mai !

Un brave temps de desvelopament fuguet consacrat au CalenDiari, un calendier donc, centrat sus los eveniments occitans e los eveniments dau malhum IEO. Participatiu, lo CalenDiari permet a tot lo monde de dintrar sos eveniments. En mai de quò, l’espleita reconeis los organizators, los luòcs e las salas d’espectacle, es capable d’afichar los eveniments sus una mapa en geolocalizar lo legidor, aglomera los eveniments Facebook, permet una tria fina o globala, mai d’un mòde de visda e de recercha… Quò es terrible !

Per que l’interfàcia dau site puescha èsser presa en man per l’equipa de redaccion dau magazina, ai animat una jornada de formacion a WordPress, mon CMS mai aimat, e tanben a Divi, lo bastidor chausit per queu site (z’utilize aquí tanben e pense que z’ai adoptat aura) e a d’autras espleitas botadas a lor dispausicion (letra d’informacion, calendier…). Queu biais de formacion es pas una prumiera per ieu, e tene a zo prepausar sistematicament, quò es dins l’interès de degun de se recuperar un site sens se’n saber servir !

Completament en occitan per lo public, Lo Diari z’es tanben costat administracion, e me demandet un brave temps de traduccion de las extensions, coma lo bastidor Divi, mas tanben WooCommerce, plata forma la mai utilizada dins lo monde ! Garde los fichiers per quilhs que ne’n voldrián, sem dins l’open source jussinca a la riba o ben tot l’i sem pas dau tot !